Sa Partorja

S’urtima figura de su Carrasecàre Anticu Thiniscolesu est SA PARTORJA. In su ditzionariu geograficu e istoricu de Sardinna Angius – Casalis de su 1833, containt chi in Thiniscole zirait un omine carotzatu ‘estitu ‘e gatía, sa cara thithieddata e sa ‘entre manna pro istorchere una emina prinza. Intrait a sas domos abochinande pro sas dolimas, petinde cumbitu. S’imbolait a terra e no si nch’andait fintzas a cando no buscait recatu o binu. In antichitate b’it benas in ateros Carrasecàres de Europa e Africa. Cuddu de sa Tracia, cuddu Berberu e cuddu Asturianu.
In su ‘e Thiniscole rapresentat sa torrata a naschire, a pustis de sa passione e sa morte de s’Orcu.
Est custu su ‘ilu chi ligat totu sos Carrasecàres mediterraneos, cumpresu cussu Thiniscolesu: Morte e torrata a naschire de sa natura, sa rapresentatzione de unu dolu, ligatu a sa vita ‘e sa campanna e a su ciclu de sas istagiones.