Su Carrasecare Anticu Thiniscolesu – 21 de Frearju 2023

Pro su primu annu dae sa naschita de s’assotziu, amus tentu manera de fraicare su Carrasecàre Anticu chin su grabu chi li cheriamus dare dae s’incumintzu. Teniamus bisonzu de gollire e dare prentziu a s’istoria nostra, ata de simbolismu, faeddos e toponimos chi nos aparteniant e chi pariant irmenticatos. Teniamus bisonzu de torrare a prenare sas carreras e sas prathas chi ant creschitu sas familias Thiniscolesas in sos annos. Su matessi bisonzu chi nos at imbertu a presentare totu chin sa limba faeddata onzi die in domo, in travallu o in sa sotzialitate chi vivimus.
Su chi est sutzessu Martis 21 de frearju est frutu de travallu ‘e istudiu, gana de lu condividere chin sa ‘idda. Ca est in custa ‘idda chi s’assotziu travallat e in custa ‘idda chi s’Orcu essit una orta e bia a s’annu. Chentz’e bisonzu de ruere in sa trampa de chie nos diat cherrere che bestieddas amasetatas de circo, “irfilande” in aterue, menzus puru in su mese ‘e Austu, pro acher piaghere a sos turistas in chirca de una foto, mustrande•nos comente unu trofeo de catza.
Su Carrasecàre Anticu Thinscolesu est unu ritu agrariu chi apartenit a sa comunitate nostra, dae prima de su cristianesimu, chin mustrat sos sinnos de sa passione, su sacrifitziu e su dolu pro sa morte de sa bestia. Totu pro sa ona resessita de su laore, in su locu suo e in su tempus suo. E gai semper at a esser. Pro una die e bia, onzi annu!
Natu custu, bi tenimus a torrare grassias a chie nos at azuatu pro sa ona resessita de sa faina. Una faina ata dae sa idda pro sa idda, chentz’e unu soddu pubricu. Una die chi at datu meta, a banda de sa carotza. Su museo de sos massaios in d’una de sas cortes prus anticas, in su coro ‘e sa ‘idda, data•nos dae sa familia Sinis. Su teatru de sos buratinos, in uve amus datu manera a sos pitzinnos nostros, de s’acurtziarent e cumprenderent su simbolismu de sa carotza. Ma prus de totu at datu manera a sa idda de torrare a nuscare un’aghera de ‘esta cundivisa comente no s’intendiat dae meta.
Totu custu grassias a su travallu atu paris chin Sa Leva ’76 de sa Grassia, sichinde chin sos cumpanzos chi ant datu una ghetata ‘e manu, a sos artigianos e a totu cuddas ativitates chi nos ant azuatu a livellu economicu pro sa bona resessita de s’eventu.
Torramus grassias a sa idda ‘e Thiniscole pro bi esseret istata e a sos furisteris pro esserent azoviatos.
Ateros annos menzus!
Assotziu Orcu ‘e Montiarvu
* Sa Galleria fotografica est de A. Cucchi